ஜிஎஸ்டியில் சேவையும் வழங்கலா ??

ஜிஎஸ்டியில் சேவையும் வழங்கலா ??

பிரிவு 7, 2(52), 2(102)

 

சு  செந்தமிழ்ச்  செல்வன்

ஜிஎஸ்டி தொழிலாற்றுநர் &பயிற்சியாளர்

 

சேவையைப்  பற்றி  விளக்க  முடியுமா ?

சேவை என்பது பயன்பாட்டு உரிமையை பிறருக்கு மாற்றிக் கொடுத்தல் :

 

சான்று :

 

Ø  அசையா  சொத்துக்களை வாடகைக்கு கொடுத்தல்,

Ø  அறிவுசார் சொத்துக்கு உண்டான உரிமை, அனுபவத்தை தற்காலிகமாக மாற்றுவது அல்லது அனுமதிப்பது.

Ø  ஒரு நடவடிக்கையில் இருந்து  விலகி இருக்க ஒத்து கொள்ளுதல் அல்லது பொறுத்துக் கொள்ளுதல்

Ø  பழுது நீக்கும் செயல்முறையை செய்தல்

Ø  கமிஷன் அடிப்படையில் எந்த ஒரு  செயலையும் செய்தால்

Ø  தகவல் தொழில நுட்பத்திற்கு தேவையான மென்பொருளுக்கான புரோகிராம் செய்தால், மேம்படுத்துதல்,டிசைன் செய்தல்

Ø  பயண சீட்டு பதிவு செய்தால் போன்றவவை

 

வெளிநாட்டிலிருந்து  பெறும் சேவை வரிக்கு  உட்படுமா ?:

 

ஆம். வணிகத்தின் போது அதன் வளர்சிக்காக இருந்தாலும் இல்லாவிட்டாலும் அதற்கான  சேவையை வெளிநாட்டிலிருந்து  பெறுதல் (இறக்குமதி). இதற்கு பண மதிப்பு இருக்க வேண்டும் என்று அவசியம் இல்லை.

 

பணமதிப்பு இல்லாவிட்டாலும்  ஜிஎஸ்டியில் வழங்கலாக  கருதப்படுமா ?

மறு பயனின்றி செய்யப்பட்ட அல்லது  செய்வதற்கு ஒத்துக்கொள்ளப்பட்ட முதல் இணைப்பு பட்டியலில் குறிப்பிடப் பட்டுள்ள கீழ்க்கண்ட செயல்கள் வழங்கலாக  கருதப்படும். இந்த இனங்கள்  பணமதிப்பு இல்லாவிட்டாலும் வழங்கல் என்றே கருதப்படும்.

 

(அ ) உள்ளீட்டு வரி வரவு எடுத்துக்க கொண்டப்பின் நிரந்தரமாக மாற்றம் செய்யப்படும் பொருள்கள். பொருள்கள், வணிகம் தொடர்பான சொத்துக்களை அகற்றுதல் (Sale )

 

(ஆ )  மாற்றிக் கொள்ளுதல் (disposal of  business assets )

 

(இ)முதல்வர் (principal ) மற்றும் முகவர்களுக்கு (agent )இடையே நடைபெறும் பொருள் சேவைகள்

 

(ஈ) வெளி நாட்டில் உள்ள தன்னுடைய நிறுவனம் அல்லது சார்பு நிறுவனங்களிடம்’ இருந்து வணிக நலனுக்காக பெறப்படும்  சேவைகள்

தொடர்பு உடையவர்களுக்கு இடையே (related person) நடைபெறும் நடவடிக்கைகள்   வழங்கலாக  கருதப் படுமா ?

 

தொடர்பு உடையவர்களுக்கு இடையே (related person) வழங்கப் படும் பொருள்கள்  அல்லது சேவைகள். இவை வணிக நலனுக்காக பணம் பெறாமல் செய்யப்பட்டாலும் இந்த  நடவடிக்கை   வழங்கலகவே கருதப்படும்.

தொடர்புடையவர்கள்  என்பது  யாரைக்  குறிக்கும் ?

 

தொடர்புடையவர்  என்பதன் கீழ் வணிகத்தின் உரிமையாளர் மற்றும் ஊழியர்கள்  அடங்குவார்கள்.  இதில் ஒரு வணிக உரிமையாளர் , தன்னுடைய  ஊழியருக்கு ஆண்டுக்கு ரூபாய்    ஐம்பது ஆயிரம்  வரை  வழங்கும் பரிசுக்கு வரியில் இருந்து விலக்கு அளிக்கப் பட்டுள்ளது.

 

தனித்துவமானவர்களுக்கு (distinct  person ) வழங்கப்படும்  பொருள்/சேவை வழங்கலா ?

 

தனித்துவமானவர்களுக்கு (distinct  person ) வழங்கப்படும்  பொருள் மற்றும் சேவையும் வழங்கலாகவே  கருதப்படும். தனித்துவமான நபர் என்பது’ஒரு வணிகத்தின் கிளைகள், செங்குத்து வணிகம் (business  vertical ) ஆகியவற்றைக் குறிக்கும். இவர்களுக்கு இடையே மாநிலத்திற்கு வெளியே இருக்கும் கிளை /தலைமை அலுவலகத்திற்கு பொருள், சேவை மாற்றம் செய்யப்படும் போது அதுவும் வழங்கலாகவே  கருதப் படும்.

 

இரண்டாவது ’இணைப்பு’பட்டியலில்’ குறிப்பிடப்பட்டுள்ள ஒரு பொருளின் உரிமையை’ வேறு ஒருவருக்கு மாற்றித்  தருதல்   பொருள்/ சேவைகளின் வழங்கலாக கருதப்படுகிறது. இதை  விளக்க முடியுமா ? .

 

வணிகத்தை நடத்துபவர், வணிகத்திற்காக வாங்கப்பட்டுள்ள பொருள்களை, தன்னுடைய சொந்த பயன்பாட்டுக்கு எடுத்துக் கொண்டாலோ அல்லது வேறு வேறு ஒருவருக்கு வணிக பயன்பாட்டுக்கு அல்லாமல் கொடுத்தாலோ அது வழங்கல் எனப்படும்.

 

ஏர்-கண்டிஷனர்  விற்பனை  செய்யும்  ஒரு  நபர்  ஒரு ஏர் கண்டிஷனரை தனது கையிருப்பில் இருந்து நிரந்தரமாக தனது வீட்டில் தனிப்பட்ட பயன்பாட்டிற்காக மாற்றுகிறார்.

 

இதில் வணிகச் சொத்து நிரந்தரமாக மாற்ற அல்லது அகற்றப்படுகிறது, ஜிஎஸ்டியின் கீழ் வழங்கலாக கருதப்படும் .

 

வணிகத்தில்  எது  வழங்கலாக   கருதப்படாது  ?

 

வரிக்கு உட்பட்ட நபர், அந்த  நிலையிலிருந்து விடுபடும் முன் வணிக நலனுக்காக செய்யப்படும் வழங்கல்கள், கீழ்க் கண்ட சூழ்நிலைகளைத் தவிர மற்ற தருணங்களில் அவை வழங்கலாகவே கருதப் படும்.

* நடைபெற்றுக் கொண்டு இருக்கும் வணிகத்தை அப்படியே வேறு ஒருவருக்கு மாற்றித் தருதல்

*  தனிப் பிரதிநிதி முலம் அந்த வணிகத்தை நடத்துதல்

*  இந்த சூழ்நிலையில் வணிகத்தை நடத்தும் பிரதிநிதி வரிக்கு உட்பட்டவராகவே கருதப்  படுவார்

 

 

கட்டி  முடிக்கப்பட்ட  கட்டிடம்  வழங்கலாக  கருதப்படுமா ?

 

விற்பனை செய்வதற்காக கட்டப்படும் வளாகம், கட்டிடம், சிவில் கட்டமைப்பு  போன்றவற்றை முழுமையாகவோ அல்லது பகுதியாகவோ விற்பனை  செய்தல். ஆனால் இதில் கட்டிடம் முழுவதும் கட்டி முடிக்கப்பட்டது  என்று சான்றிதழ் வழங்கியப் பின்னரோ அல்லது அந்த கட்டிடத்தில் ஒருவர்  குடிபெயர்ந்தாலோ அல்லது இதில் எது முந்தியதோ அதற்குப் பின் முழுத் தொகையும் பெற்றிருந்தால்  இந்த நடவடிக்கை வழங்கலில் அடங்காது.  ஆனால் கட்டிடம் காட்டும் போதே வாங்குபவரிடம் முழுத் தொகை பெற்றிருந்தால் அது  வழங்கலாக கருதப்படும்.

அறிவுசார் சேவை வழங்கலைப்  பற்றி  கூறவும்  ?

 

அறிவுசார் சொத்துக்களை பிறர் பயன்படுத்த உரிமை அளித்தல் அல்லது  தற்காலிக பரிமாற்றம் செய்தல், தகவல் தொழில் நுட்ப மென்பொருளை தயாரித்தல், மேம்படுத்துதல், உருவாக்குதல், செயல்முறை வகுத்தல்,                 உயர்தரமாக்குதல், நடைமுறைப்படுத்துதல், ஒரு நடவடிக்கையில் இருந்து விலகி இருக்க ஒப்புக் கொள்ளுதல், பொறுத்துக் கொள்ளுதல், ஒரு செயல் செய்தல்  இவை  அனைத்தும்  சேவையாக  கருதப் படும்.

ஒரு கிளப் அல்லது சங்கம் அல்லது சங்கம் அதன் உறுப்பினர்களுக்கு சேவை அல்லது பொருட்களை அளிப்பது வழங்கலாக  கருதப்படுமா ?

ஆம். ஒரு கிளப், சங்கம், சமூகம் அல்லது அதன் உறுப்பினர்களுக்கு வசதிகளை வழங்குவது வழங்கலாக  கருதப்படும். இது CGST/SGST சட்டத்தின் பிரிவு 2(17) (‘e)இல் 'வணிகம்' என்பதன் வரையறையில் சேர்க்கப்பட்டுள்ளது

 

வேலை ஒப்பந்தங்கள் மற்றும் கேட்டரிங் சேவைகள் பொருட்கள் வழங்கல் அல்லது சேவைகள் வழங்கல் என கருதப்படுமா?

வேலை ஒப்பந்தங்கள் மற்றும் கேட்டரிங் சேவைகள் இரண்டும் ஜிஎஸ்டி சட்டத்தின் அட்டவணை-II இல் எண். 6 (a) மற்றும் (b).படி  சேவைகளின் வழங்கலாக  கருதப்படும்.

 

கூலி  வேலை  (ஜாப்  ஒர்க்). செய்ய   அனுப்பப்படும் பொருட்கள்   வழங்கல்  என்ற  தகுதியை  பெருமா ?

இல்லை, பொருள்கள்  தற்காலிகமாக அனுப்பப்படுவதாலும்,   கூலி   வேலை  முடித்ததும் பொருட்கள் திரும்ப  அனுப்பப்படுவதாலும்,  இந்த   நடவடிக்கையை  வழங்கலாக     கருத முடியாது.

 

வழங்கல்   அல்லது  சேவையாக  கருதப்படாது  எந்த   பிரிவில்  கூறப்பட்டுள்ளது ?

சிஜிஎஸ்டி சட்டத்தின்  முன்றாவது அட்டவணையில்  குறிப்பிடப்பட்டுள்ள  செயல்பாடுகள் அல்லது பரிவர்த்தனைகள் பொருட்கள் வழங்கல் அல்லது சேவை வழங்கல் என கருதப்படக்கூடாது.

 

வழங்கல்   அல்லது  சேவையாக  கருதப்படாதது  எவை என்பதை  விரிவாக  கூறவும் ?

1. ஒரு பணியாளர் தனது வேலையின் போது அல்லது அது தொடர்பாக அதன்  உரிமையாளருக்கு  செய்யும் சேவைகள்.

2. தற்போதைக்கு நடைமுறையில் உள்ள எந்தவொரு சட்டத்தின் கீழ் நிறுவப்பட்ட எந்த நீதிமன்றம் அல்லது தீர்ப்பாயத்தின் சேவைகள்.

( "நீதிமன்றம்" என்பது  மாவட்ட நீதிமன்றம், உயர் நீதிமன்றம் மற்றும் உச்ச நீதிமன்றம் ஆகியவை அடங்கும்)

3. பாராளுமன்ற உறுப்பினர்கள், மாநில சட்டமன்ற உறுப்பினர்கள், பஞ்சாயத்து உறுப்பினர்கள், நகராட்சி உறுப்பினர்கள் மற்றும் பிற உள்ளாட்சி அமைப்புகளின் உறுப்பினர்கள் ஆற்றும் செயல்பாடுகள்;

அந்தத் தகுதியில் அரசியலமைப்பின் விதிகளுக்கு இணங்க எந்தவொரு பதவியையும் வகிக்கும் எந்தவொரு நபரும் ஆற்றும் கடமைகள்; அல்லது

மத்திய அரசு அல்லது மாநில அரசு அல்லது உள்ளூர் அதிகாரசபையால் நிறுவப்பட்ட அமைப்பில் தலைவர் அல்லது உறுப்பினர் அல்லது இயக்குநராக யாரேனும் ஒருவர் ஆற்றிய கடமைகள் மற்றும் இந்த உட்பிரிவு தொடங்கும் முன் பணியாளராகக் கருதப்படாதவர்.

4. இறந்தவரின் போக்குவரத்து உட்பட இறுதிச் சடங்கு, அடக்கம், தகனம் அல்லது சவக்கிடங்கு ஆகியவற்றின் சேவைகள்.

5. நிலம் விற்பனை மற்றும், அட்டவணை II இன் பத்தி 5 இன் பிரிவு (b) க்கு உட்பட்டு, கட்டிட விற்பனை.

6. லாட்டரி, பந்தயம் மற்றும் சூதாட்டம் தவிர, செயல்படக்கூடிய உரிமைகோரல்கள்.

- தமிழ் தொழில் உலகம்-ஆகஸ்டு 2022  இதழில் வெளிவந்தது.

GSTPS : Tally 3.0 - Mr. S. Velayutham, Trainer Tally Software

வணக்கம்.  ஒவ்வொரு மாதமும் நாலாவது வாரத்தில் நேரடியாக ஒன்று கூடி, கூட்டம் நடத்துவது நமது வழக்கம்.  அதன் தொடர்ச்சியில் இன்று 25வது நேரடிக்கூட்டமாக எழும்பூரில் உள்ள இக்சா மையத்தில் மதியம் கூடினோம்.

 

இனிய தமிழ்த்தாய் வாழ்த்துடன் கூட்டம் துவங்கியது.  வந்தவர்களை வரவேற்றும், இன்று நமக்கு வகுப்பு எடுக்க இருக்கும் Tally பயிற்சியாளர் வேலாயுதம் பற்றியும்  நமது பொருளாளர் செல்வராஜ் அறிமுக உரை வழங்கினார்.  வேலாயுதம் அவர்கள் கடந்த காலங்களில் Tally குறித்து நம்மிடையே இரண்டுமுறை உரையாற்றியிருக்கிறார்.

 

நமது தொழிலில் கணக்குகளைப் பராமரிக்க பெரும்பாலும் Tally மென்பொருளை பயன்படுத்தி வருகிறோம். ஜி.எஸ்.டி துவங்கிய காலத்தில் இருந்து தொடர்ச்சியாக புதுப்புது மாற்றங்களை அறிவித்துக்கொண்டே இருக்கிறது.  Tallyயும் அதற்கேற்ப தனது மென்பொருளில் மாற்றங்களை செய்து கொண்டே வருகிறது. இப்பொழுது Tally Prime 3.0  என அறிமுகப்படுத்தியிருக்கிறது என்பதை தமிழில் பயிற்சியாளர் வேலாயுதம் புரியும் விதத்தில் அருமையாக விளக்கினார்.

 

ஒரு நிறுவனம் தன்னுடைய ஒரே பானில் (PAN)  இரண்டு, இரண்டுக்கும் மேற்பட்ட தொழில்களை செய்யும் பொழுது, நாம் தனித்தனியாக Tallyயில் கணக்குகளை பராமரித்து ஆண்டு முடிவில் தணிக்கையாளர் இணைத்து வருமான வரித்தாக்கல் செய்கிறார்.  அந்த சிரமத்தை தவிர்ப்பதற்காக இப்பொழுது ஒரே கணக்கில் எல்லா கிளை/பிற தொழில்களின் கணக்குகளையும் ஒருங்கிணைக்க ஏற்பாடு செய்து தந்திருக்கிறது.  மேலும் ஜி.எஸ்.டிக்கு தனித்தனியாக மாதாந்திர ரிட்டன்களையும் தாக்கல் செய்யமுடிகிற ஏற்பாட்டையும் செய்து தந்திருக்கிறது.

 

ஜி.எஸ்.டியில் பதிவு செய்யாத நிறுவனம் தேவை கருதி, ஜி.எஸ்.டி பதிவு எண்ணை பெறும் பொழுதும், இதுவரை ஜி.எஸ்.டி எண்ணை பயன்படுத்திக்கொண்டிருந்த நிறுவனம் தன்னுடைய பதிவை முறையாகவோ/ஜி.எஸ்.டி ரத்து செய்யும் பொழுதோ, Tally யில் உரிய மாற்றங்களை செய்து கொள்ள வசதிகளை செய்து தந்திருக்கிறது.

 

நம் Tally கணக்கில் ஒரு பதிவை நீக்கும் பொழுது, அதன் வரிசை எண் மாறும் அல்லவா! இப்பொழுது இ இன்வாய்ஸ்  என இருக்கும் பொழுது இப்படி மாறுவது என்பது வேறு வேறு கோளாறுகளை உருவாக்குகிறது. இப்பொழுது அதற்கும் ஒரு தீர்வை கண்டறிந்திருக்கிறது.

 

இப்படி இன்னும் சில அம்சங்களை அறிமுகப்படுத்தினார்.

தேநீர் இடைவேளைக்கு பிறகு….

வரி ஆலோசகர்களாகிய நாம்  நமது வாடிக்கையாளர்கள் குறித்த தகவல்களை நாம் ஒவ்வொருவரும் அவரவர் அறிந்த வழிகளில் பராமரித்து வருகிறோம்.  சிலர் இதற்கான சிறப்பு மென்பொருளை பயன்படுத்துகிறார்கள். சிலர் எக்ஸைலைப் (Excel) பயன்படுத்துகிறார்கள்.

இப்பொழுது புதிதாக எக்சைலில்  நாமே  நமது வாடிக்கையாளர்களின் அடிப்படையான தகவல்களை உள்ளே இடும் பொழுது  அது எல்லாவற்றையும் தொகுத்து மேம்பட்ட வகையில் நமக்கு பயன்படும் சில உபயோகமான அறிக்கைகளை பயன்படும் வகையில் தருகிறது.  இதை Tally பயிற்சியாளர் அரவிந்தன் அவர்கள் விளக்கி கூறினார்.

 

இந்த எக்சைலை  இப்பொழுது (Trial என்ற முறையில்) நமக்கு இலவசமாக தந்திருக்கிறார்கள். நம்மில் ஒருவர் பெற்றுக்கொள்ளலாம் என தெரிவித்த பொழுது Dr. வில்லியப்பன் அவர்கள் இதைப் பெற்றுக்கொண்டார். அதை நாம் தொடர்ந்து பயன்படுத்தும் பொழுது, இன்னும் மேம்படுத்த நமக்கு உதவுவதாகவும் தெரிவித்தார். நமது உறுப்பினர்கள் அவரிடம் கேட்டுப் பெற்றுக்கொள்ளலாம்.

பங்கேற்றவர்கள் கேட்ட சந்தேகங்களுக்கு தலைவர் செந்தமிழ்ச்செல்வன் அவர்கள் விளக்கமளித்தார்.

இறுதியில் நன்றியுரையை  நமது உறுப்பினர் முனியசாமி வழங்கினார்.

“பயிற்சியாளர் வேலாயுதம் அவர்கள் Tally குறித்து எளிமையாகவும், அனைவருக்கும் புரியும் விதத்தில் விளக்கினார். எதிர்காலத்திலும் நமக்கு பயிற்றுவிக்க அவரையே நாம் அழைக்கலாம்.  அவருக்கு நன்றி.  Tally CRM (Customer Relationship Manager)  டூல் பற்றி எளிமையாக புரியும் விதத்தில் விளக்கினார். அவருக்கும் நன்றி.   இன்றைக்கு இடைவெளியில்…  சூடான காபி, போண்டா வழங்கியது Dr. வில்லியப்பன் அவர்கள். அவருக்கு இரண்டு மகள்கள். இரண்டாவது மகளது திருமணம் சமீபத்தில் நடைபெற்றது. நமது நிர்வாகிகளும், உறுப்பினர்கள் சிலரும் கலந்துகொண்டோம். அந்த மகிழ்ச்சியை உறுப்பினர்களோடும் பகிர்ந்துகொண்டார்.

நமது உறுப்பினர் சண்முகப்ப்ரியா அவர்களுக்கு சமீபத்தில் மகன் பிறந்துள்ளார்.  தமிழ் என பெயர் வைக்கப்போவதாக தெரிவித்தார்கள். மகிழ்ச்சி.  அவருடைய உடன் பிறந்த சகோதரியும் நமது உறுப்பினருமான செல்வராணி அவர்கள் அந்த மகிழ்ச்சியை பகிர்ந்துகொள்ளும் விதத்தில்  எல்லோருக்கும் சுவையான லட்டுகள் வழங்கினார்.

 நமது உறுப்பினர்கள் தமது இல்லத்து மகிழ்வான நிகழ்வுகளை இப்படி மற்ற உறுப்பினர்களோடு பகிர்ந்துகொள்ளும் பண்பு என்பது மகிழ்ச்சி தரக்கூடியது.   சொசைட்டி துவங்கிய காலத்தில் இருந்தே இந்த பண்பாடு இருக்கிறது. இப்பொழுதும் தொடர்கிறது. எதிர்காலத்திலும் தொடரவேண்டும்.  வந்து கலந்துகொண்ட அனைவருக்கும் நன்றி.”

கூட்டம் இனிதே முடிவுற்றது.

 

- GSTPS

தொடர்பு கொள்ள : 095000 41971,  098412 26856

தளம் : https://gstprofessionalssociety.blogspot.com

மின்னஞ்சல் : gstpschennai@gmail.com

யூடியூப் : https://www.youtube.com/@gstprofessionalssociety6987

பேஸ்புக் : https://www.facebook.com/groups/792542932366102